Ferhaleskriuwe: dialooch, spanningsopbou, perspektyf – Jetske Bilker
Mei in moai idee omrinne en dêr in ferhaal oer skriuwe wolle, mar net krekt witte hoe’t dat moat, in soad minsken werkenne dat gefoel. Want wat dochst mei sa’n goed idee? En hoe moatst begjinne?
Yn dizze workshop krije jo praktyske tips foar it skriuwen fan in ferhaal en kinne jo direkt oan ‘e slach mei lytse opdrachten. We geane oan ‘e gong mei it skriuwen fan in dialooch, it opbouwen fan spanning en we besykje in gegeven út ferskillende stânpunten wei te sjen. We lêze en bekommentariearje inoars wurk omdat men dêr ek in soad fan opstekke kin. Oan ‘e ein witte jo wêr’t in goed ferhaal oan foldwaan moat en kinne jo faaks sels oan ‘e slach!

Jetske Bilker hat trije boeken op har namme: in roman, in ferhalebondel en yn 2004 skreau se it boekewikegeskink: Oar plak oare tiid. Nei har stúdzjetiid literatuerwittenskip wurke se alve jier yn it middelber ûnderwiis as learaar Frysk en Nederlâns. Op it stuit is se dwaande mei in roman, mar ek set se geregeld wurk oer, lykas it earste diel fan de Harry Potterrige. Se siet yn de redaksje fan Trotwaer en letter fan it ynternettydkskrift Farsk, dêr’t se ferhalen redigearre, skriuwers oanstjoerde en kritiken skreau. Sûnt 2006 resensearret se Frysk proaza foar de Ljouwerter Krante.

 

Werom

Lêste update: